پاکستان نے اپنی سمندری حدود میںجنگی اور ایٹمی بحری جہازوں کے بغیر اجازت داخلے پر پابندی عائد کر دی، خلاف ورزی پر5 سال قید اوربھاری جرمانہ ہوگا

کراچی (آئی این پی )وفاقی حکومت نے سمندری حدود میں ملکی سیکیورٹی اور سالمیت سے متعلق ‘میری ٹائم زونز ایکٹ 2020’ کی منظوری دے دی۔ نجی ٹی وی کی رپورٹ میں دستاویز کا حوالہ دیتے ہوئے کہاگیا کہ میری ٹائم زونز ایکٹ 2020 کے تحت غیر ملکی جنگی اور ایٹمی بحری جہازوں کے پاکستانی حدودمیں داخلے کے لیے پیشگی اجازت لازم قرار دی گئی ہے اور آئندہ سے غیر ملکی سب میرینز اور دیگر واٹر وہیکلز کا داخلہ بھی وفاقی حکومت کی پیشگی اجازت سے ہوگا۔

نئے ایکٹ کے مطابق پاکستانی حدود میں پاکستان کے دفاع سے متعلق معلومات اکھٹی کرنے اور اسلحے کے استعمال پربھی کارروائی ہوگی، اس کے علاوہ کرنسی، افراد کی لوڈنگ، ان لوڈنگ، ریسرچ اور سروے پر بھی پابندی عائد کردی گئی ہے۔خلاف ورزی کے مرتکب بحری جہازکو قبضے میں لیکر قانونی کارروائی کی جائیگی اور میری ٹائم زونز ایکٹ 2020کی خلاف ورزی پر5 سال قید اوربھاری جرمانہ ہوگا۔دستاویز کے مطابق وفاقی حکومت کی جانب سے سمندری حدود کا تعین کیا جائیگا اور ساحل کے اطراف موجود پانی کوپاکستان کاداخلی پانی قراردیاجائیگا۔۔۔۔۔



اس وقت سب سے زیادہ مقبول خبریں